Numbers 29

IDili lamaCilongo

1“ ‘Ngosuku lwakuqala ngenyanga yesikhombisa banini lombuthano ongcwele njalo lingenzi imisebenzi yezinsukwini. Lusuku lwenu lokutshaya amacilongo. 2Lungisani umnikelo wokutshiswa, kube liphunga elimnandi kuJehova, inkunzi eliguqa eyodwa, inqama eyodwa lamazinyane ezimvu amaduna ayisikhombisa alomnyaka owodwa wokuzalwa, konke kungelasici. 3Kuzakuthi inkunzi leyo liyilungise kanye lomnikelo wamabele azingxenye ezintathu kokulitshumi kwehefa yefulawa ecolekileyo exutshaniswe lamafutha; kuthi inqama ibe lokubili etshumini; 4kuthi-ke linye ngalinye izinyane lemvu kwayisikhombisa, lihambe lokukodwa etshumini. 5Akube khona lembuzi eyodwa enduna ibe ngumnikelo wesono ukuzenzela indlela yokubuyisana. 6Lokhu kuzabe kusengezelela iminikelo yokutshiswa yenyanga zonke kanye leyezinsuku zonke ndawonye leminikelo yamabele leyokunathwayo njengokumisiweyo. Le yiminikelo eyenzelwa uJehova ngomlilo – iphunga elimnandi.

Usuku lokuBuyisana

7“ ‘Ngosuku lwetshumi lwaleyonyanga yesikhombisa banini lombuthano ongcwele. Kumele lizidele njalo lingasebenzi. 8Nikelani umnikelo wokutshiswa, kube liphunga elimnandi kuJehova, inkunzi eliguqa eyodwa, inqama eyodwa lamazinyane ezimvu amaduna ayisikhombisa alomnyaka owodwa wokuzalwa, konke kungelasici. 9Kuzakuthi inkunzi leyo uyilungise kanye lomnikelo wamabele azingxenye ezintathu kokulitshumi zehefa zingezefulawa ecolekileyo exutshaniswe ngamafutha; kuthi inqama ihambe lokubili etshumini; 10kuthi-ke linye ngalinye izinyane lemvu kwayisikhombisa, lihambe lokukodwa etshumini. 11Akube khona lembuzi eyodwa enduna ibe ngumnikelo wesono, phezu komnikelo wesono, owokubuyisana kanye lomnikelo wokutshiswa wezinsukwini lomnikelo wawo wamabele, kanye leminikelo yayo yokunathwayo.

Idili lamaThabanikeli

12“ ‘Ngosuku lwetshumi lanhlanu ngenyanga yesikhombisa, banini lombuthano ongcwele njalo lingenzi imisebenzi yensukwini. Jabulani ngedili kuJehova okwezinsuku eziyisikhombisa.

13Nikelani umnikelo wokutshiswa, kube liphunga elimnandi kuJehova, umnikelo wokutshiswa wezinkunzi ezingamaguqa ezilitshumi lantathu, izinqama ezimbili lamazinyane ezimvu amaduna alitshumi lane alomnyaka ezelwe, konke kungelasici. 14Kuthi inkunzi inye ngayinye kwezilitshumi lantathu liyilungise kanye lomnikelo wamabele azingxenye ezintathu kokulitshumi kwehefa lefulawa ecolekileyo exutshaniswe lamafutha; kuthi inqama nganye kwezimbili, ihambe lokubili etshumini; 15kuthi-ke linye ngalinye izinyane lemvu kwalitshumi lane, lihambe lokukodwa etshumini. 16Akube khona lembuzi eyodwa enduna ibe ngumnikelo wesono, phezu komnikelo wokutshiswa wezinsukwini ndawonye lomnikelo wawo wamabele lowokunathwayo.

17“ ‘Ngosuku lwesibili lungisani izinkunzi ezingamaguqa ezilitshumi lambili, inqama ezimbili lamazinyane ezimvu amaduna alitshumi lane alomnyaka owodwa wokuzalwa, konke kungelasici. 18Ndawonye lezinkunzi inqama kanye lamazinyane ezimvu lungisani umnikelo wakho wamabele kanye lowokunathwayo kusiya ngenani eliqanjiweyo. 19Akube lembuzi eyodwa enduna ibe ngumnikelo wesono, phezu komnikelo wokutshiswa wezinsukwini ndawonye lomnikelo wawo wamabele, kanye leminikelo yayo yokunathwayo.

20“ ‘Ngosuku lwesithathu lungisani izinkunzi ezilitshumi lanye, izinqama ezimbili kanye lamazinyane ezimvu alitshumi lane alomnyaka owodwa wokuzalwa, konke kungelasici.

21Ndawonye lezinkunzi, lezinqama, kanye lamazinyane ezimvu, lungisani iminikelo yakho yamabele kanye leminikelo yakho yokunathwayo kusiya ngenani eliqanjiweyo. 22Akube lembuzi eyodwa enduna ibe ngumnikelo wesono, phezu komnikelo wokutshiswa wezinsukwini ndawonye lomnikelo wakho wamabele kanye lomnikelo wokunathwayo.

23“ ‘Ngosuku lwesine lungisani izinkunzi ezilitshumi, izinqama ezimbili kanye lamazinyane ezimvu alitshumi lane amaduna alomnyaka owodwa wokuzalwa, konke kungelasici.

24Ndawonye lezinkunzi, inqama kanye lamazinyane ezimvu, lungisani iminikelo yakho yamabele kanye leminikelo yakho yokunathwayo kusiya ngenani eliqanjiweyo.

25Akube lembuzi eyodwa enduna ibe ngumnikelo wesono, phezu komnikelo wokutshiswa wezinsukwini ndawonye lomnikelo wakho wamabele kanye lomnikelo wakho wokunathwayo.

26“ ‘Ngosuku lwesihlanu lungisa izinkunzi ezificamunye, izinqama ezimbili kanye lamazinyane ezimvu alitshumi lane amaduna alomnyaka owodwa wokuzalwa, konke kungelasici. 27Ndawonye lezinkunzi, izinqama kanye lamazinyane ezimvu, lungisa iminikelo yakho yamabele kanye leminikelo yakho yokunathwayo kusiya ngenani eliqanjiweyo.

28Akube lembuzi eyodwa enduna ibe ngumnikelo wesono, phezu komnikelo wokutshiswa wezinsukwini ndawonye lomnikelo wakho wamabele kanye lomnikelo wakho wokunathwayo.

29“ ‘Ngosuku lwesithupha lungisani izinkunzi ezificamibili, izinqama ezimbili lamazinyane ezimvu amaduna alitshumi lane alomnyaka owodwa wokuzalwa, konke kungelasici. 30Ndawonye lezinkunzi, izinqama kanye lamazinyane ezimvu, lungisa iminikelo yayo yamabele kanye leminikelo yayo yokunathwayo kusiya ngenani eliqanjiweyo.

31Akube lembuzi eyodwa enduna ibe ngumnikelo wesono, phezu komnikelo wokutshiswa wezinsukwini ndawonye lomnikelo wakho wamabele kanye lomnikelo wakho wokunathwayo.

32“ ‘Ngosuku lwesikhombisa lungisa izinkunzi eziyikhombisa, inqama ezimbili lamazinyane ezimvu amaduna alitshumi lane alomnyaka owodwa wokuzalwa, konke kungelasici.

33Ndawonye lezinkunzi, izinqama lamazinyane ezimvu, lungisa iminikelo yakho yamabele kanye leminikelo yakho yokunathwayo kusiya ngenani eliqanjiweyo. 34Akube lembuzi eyodwa enduna ibe ngumnikelo wesono, phezu komnikelo wokutshiswa wezinsukwini ndawonye lomnikelo wakho wokunathwayo.

35“ ‘Ngosuku lweficamibili buthanani njalo lingenzi imisebenzi yensukwini. 36Nikelani umnikelo owenziwe ngomlilo kube liphunga elimnandi kuJehova, umnikelo wokutshiswa owenkunzi eyodwa, inqama eyodwa kanye lamazinyane ezimvu amaduna ayisikhombisa alomnyaka owodwa wokuzalwa, konke kungelasici. 37Ndawonye lenkunzi, inqama kanye lamazinyane ezimvu, lungisani iminikelo yakho yamabele kanye leminikelo yakho yokunathwayo kusiya ngenani eliqanjiweyo.

38Akube lembuzi eyodwa enduna ibe ngumnikelo wesono, phezu komnikelo wokutshiswa wezinsukwini ndawonye lomnikelo wakho wamabele kanye lomnikelo wakho wokunathwayo.

39“ ‘Ukwengezelela kulokho elinikela ngakho ngesifungo loba ngokuzikhethela, uJehova mlungiseleni lokho emadilini enu amisiweyo: iminikelo yenu yokutshiswa, iminikelo yamabele, iminekelo yokunathwayo kanye leminikelo yobudlelwano.’ ”

40UMosi watshela abako-Israyeli konke lokho uJehova ayemlaye ngakho.